Federata Shqiptare e Sportit Shkollor, FSHSSH, është entitet i pavarur, organizatë jofitimprurëse, e themeluar në Tiranë, Shqipëri në 14 Prill 2016 dhe e regjistruar me Vendim në Gjykatë Nr.5339, më 16 Maj 2016 nga shoqatat e sportit shkollor të mësuesve të edukimit fizik të vendit. FSHSSH identifikohet me Statut Nr. 1435/1 Prot. Datë 17.03.2016.
Federata ushtron veprimtarinë e saj bazuar në Ligjin Nr. 105/2020 “Për Sportin” Neni 6, ‘Edukimi fizik dhe sporti në sistemin arsimor’, në Ligjin Nr. 8788, datë 07.05.2001 "Për organizatat jofitimprurëse”, si dhe mbi parimet e Kartës Evropiane të Sportit dhe rekomandimet e organizatave ndërkombëtare në fushat e sportit bazë, shëndetit dhe mirëqenies.
FSHSSH ka eksperiencë dhe ekspertizë të gjerë për zbatimin e projekteve, eventeve sportive shkollore për të gjithë fëmijët e moshës 6-18 vjeç (përfshirë fëmijët me nevoja të veçanta), për organizmin e lojërave argëtuese lëvizore për fëmijët e kopshtit mosha 3-6 vjeç, në ofrimin e trajnimeve profesionale për mësuesit e Edukimit Fizik dhe edukatoret e kopshteve në Shqipëri (teorikisht dhe praktikisht) dhe për të udhëhequr seminare shkencore, konferenca (kombëtare dhe ndërkombëtare), kampionate shkollore, workshop, si dhe për të botuar studime mbi standardet arsimore dhe libra.
FSHSSH udhëhiqet nga parime shkencore për t’u kujdesur për shëndetin dhe mirëqenien e shoqërisë shqiptare dhe është drejtuesi për zbatimin e strategjisë së re shkencore ‘Platforma e Edukimit Fiziko-Sportiv në Sistemin Arsimor Para-Universitar në Shqipëri’.